Ghe gera la ceseta tuta bianca
la piera dei scalini a varechina
e su l'altare la tovaia fina
col merlo ricamà da la Borsona.

Ghe gera i banchi co' la roba bona,
le paste, le spumiglie, le nosèle,
i tosi rocolàva le putèle
e mi sercava i oci de 'na dona.

A la sagra gò visto la me Maria,
a la sagra gò visto la me Maria.
Bela Maria, mi te ricordo quando gera primavera
là sul prà de la Bilòca rente'l bosco de Cornàle,
quanti basi a denti streti fin che te faseva male,
quanti basi a boca ferma fin che 'na volta te ghe imparà.

A la sagra gò visto la me Maria,
a la sagra gò visto la me Maria.
Bela Maria, passa la gente, tuti ride no i sa gnente;
se sarà che to marìo, se sarà che 'l s'inacorze,
se sarà, scapémo via co' la sagra zé finìa:
mi te speto al capitelo dove se ferma le rogassiòn.

Gera la sagra su in contrà
la me Maria la zé tornà co' so marìo.
Gera la sagra su in contrà
la me Maria la zé tornà maridà.